Në mbledhjen e fundit, Komiteti Ekzekutiv i Federatës Shqiptare të Futbollit miratoi ndërtimin e një fushe futbolli me bar artificial pranë muzeut “Martin Cani”.
Ky projekt, i iniciuar pas kërkesës së familjes Cani dhe mbështetjes së Presidentit të FSHF-së, Armand Duka, synon të nderojë kujtimin e të ndjerit Martin Cani dhe të promovojë përmes sportit vlerat e edukimit, respektit dhe ndërgjegjësimit te brezat e rinj.
Fusha e futbollit pranë muzeut “Martin Cani” do të ketë një sipërfaqe prej 60 m² dhe do të shërbejë si një simbol kujtese.
Martin Cani humbi jetën tragjikisht më 18 nëntor 2024, pas një përleshjeje me bashkëmoshatarin e tij Mario Përlleshaj, në afërsi të shkollës 9-vjeçare “Fan Noli” ku të dy ishin nxënës.
Konflikti mes tyre, që kishte nisur brenda ambienteve të shkollës, përfundoi në dhunë fizike jashtë saj, ku Përlleshaj e goditi Canin me thikë në bark, duke i shkaktuar plagë vdekjeprurëse. I plagosur rëndë, 14-vjeçari arriti të ecë disa metra deri pranë hyrjes së shkollës, ku u rrëzua dhe më pas ndërroi jetë në spital.
Nga ngjarja mbeti i plagosur edhe shoku i ngushtë i viktimës, Luis Meçaj, si dhe vetë autori, i cili u trajtua për disa ditë në një spital privat.
