Sot ishte afati i fundit i regjistrimit të partive dhe Komisioni Qendror i Zgjedhjeve konfirmoi se, në përfundim të afatit ligjor, 35 parti dorëzuan kërkesat për regjistrimin në zgjedhjet lokale të 30 Qershorit. Mes tyre është edhe Partia Bashkimi Demokrat.
Këtë pasdite vjen dhe vendimi surprisë i partisë “Bashkimi Demokrat” që drejtohet nga Ylber Valteri. Kjo forcë politike vendosi sot të tërheqë kërkesën për regjistrim në zgjedhje. Kryetari Ylber Valteri i ka kërkuar KQZ-së që në mbledhjen e ardhshme të përfshijë në rendin e ditës çregjistrimin e partisë së tij, duke konsideruar se pjesëmarrja në zgjedhje është akt i vullnetit politik.
“Vullneti i PBD është që zgjedhjet duhet të realizohen me pjesëmarrjen e opozitës dhe se në kushtet e mosregjistrimit nga partitë kryesore të opozitës, zgjedhjet do të konsideroheshin farsë dhe të dëmshme për Shqipërinë dhe interesat e qytetarëve shqiptarë,” – shkruan kryetari i Partisë Bashkimi Demokrat, Ylber Valteri në kërkesën drejtuar KQZ për çregjistrim nga zgjedhjet e 30 qershorit.
Vendimi i tij erdhi një ditë pasi PD-ja krijoi koalicionin me partitë kryesore të opozitës dhe, në të kaluarën, PBD-ja ka qenë aleate e PD-së. Duke qenë se marrëveshja lë hapur mundësinë për zgjerimin e koalicionit me parti të tjera, vendimi i sotëm i PBD-së për t’u tërhequr nga zgjedhjet, duket se ka shtuar një aleat potencial në radhët e koalicionit të ri opozitar.
