Policia ka zbardhur detaje të reja nga plagosja me armë zjarri e 48-vjeçarit në Korçë, mbrëmjen e shkuar.
Ngjarja u regjistrua në një nga lokalet e qytetit, gjatë kohës kur po luhej ndeshja Francë-Shqipëri, shkruan “Panorama”.
I plagosuri ishte i shoqëruar nga dy miqtë e tij.
Teksa po shihnin ndeshjen, një person është afruar dhe ka qëlluar në shpatull 48-vjeçarin me inicial I.H.
Ky i fundit u dërgua menjëherë në spital dhe është jashtë rrezikut për jetën.
Autori i ngjarjes është një 28-vjeçar me iniciale I.H.
Ai është identifikuar nga personat e pranishëm në lokal, ndërsa rezulton një person me precedentë penalë të mëparshëm.
I riu është ende në kërkim, ndërsa një grup hetimor po punon për zbardhjen e rrethanave të ngjarjes.
Deri më tani, nuk rezulton që mes autorit dhe të plagosurit, të ketë pasur konflikte të mëparshme.
