Futbollisti me origjinë shqiptare, Xherdan Shaqiri, është lojtari më i ri i skuadrës franceze, Olympique Lyon. Ditën e djeshme, shqiptari ai ka kryer vizitat mjekësore dhe ka bërë edhe stërvitjen e parë, i distancuar nga pjesa tjetër e ekipit. Së fundmi, sulmuesi ka thënë edhe fjalët e para si futbollist i Lyon.
“Mendoj se projekti është i rëndësishëm. Trajneri ishte gjithashtu themelor, ai më telefonoi dhe biseduam për shumë gjëra. Gjithashtu kisha mundësi të tjera, por kur diskutova dhe duke menduar historinë e klubit, vendosa për këtë.
Qëllimi është gjithmonë të përmirësohesh dhe të fitosh tituj dhe e njëjta gjë është edhe për mua. Jam këtu për të ndihmuar Lyon të shkëlqejë sërish. Klubi ka një histori të madhe, duhet të fitojë tituj dhe padyshim të jetë pjesë e Champions League, në nivelet më të larta”, u shpreh mes të tjerash Shaqiri.
Xherdani u largua nga Liverpool pak ditë më parë dhe nuk mungoi as një falënderim për tifozët e kuq, duke iu shprehur se do t’iu mungojë shumë mbështetja e tyre. Me fanellën e Liverpool, Shaqiri fitoi Champions League dhe Premier League, duke qenë pjesë e një grupi fantastik nën urdhrat e Jurgen Klopp. Tashmë, Shaqiri vazhdon aventurën e tij në Francë…
