Gjykata e Posaçme kundër Korrupsionit dhe Krimit të Organizuar ka urdhëruar SPAK-un që të hetojë kallëzimin e bërë kreu i dhomës së përmbaruesve privat Tedi Malaveci ndaj kreut të Bankës së Shqipërisë.
Gjyqtarja Flora Hajredinaj, vendosi të quajë të pavlefshëm vendimin e pushimit nga ana e Prokurorisë së Tiranës dhe ka urdhëruar Prokurorinë e Posaçme që të vijojë hetimet në lidhje me këtë kallëzim.
Mësohet se guvernatori është kallëzuar në vitin 2022 në Prokurorinë e Tiranës për “shpërdorim detyre” nga Dhoma e Përmbaruesve Privatë, si autor i krijimit të skemave të mashtrimit me mikrokredi. Kallëzimi, është hetuar për dy vjet nga kjo prokurori dhe në fund është kërkuar të pushohet në janar të këtij viti nga prokurorja Ornela Rrumbullaku.
Në seancat e gjykimit para gjyqtares Migena Laska është paraqitur vetë kreu i përmbarimit Tedi Malaveci, ku ka munguar guvernatori Sejko dhe prokurorja Rrumbullaku. Ndër pretendimet e shumta të kreut të përmbarimit të renditura në vendimin e Laskës, kryesori është ai që ka të bëjë me ndryshimin e rregullores së bankës qendrore për të favorizuar shoqëritë mikrofinancë.
Sipas këtyre pretendimeve gjykatësja ka vendosur që ta dërgojë çështjen për kompetencë dhe vlerësim në Gjykatën e Posaçme Antikorrupsion. Gjykata e Posaçme këtë të mërkurë, vendosi ta quajë të pavlefshëm pushimin dhe të urdhërojë dërgimin e akteve në SPAK për plotësim hetimesh.
Guvernatorit Sejko tani gjendet përballë dy proceseve paralele penale në SPAK, njërin që e dërgoi prokurori i Tiranës Leonard Filopati disa javë më parë me të njëjtin pretendim moskopetencë dhe tjetri që lidhet me këtë vendim të gjyqtares, Flora Hajredinaj.
