Gjykata e Posaçme ka lënë në masën e sigurisë “arrest me burg” Florenc Çapjan, i cili u ekstradua nga Dubai disa ditë më parë.
Çapja, 44 vjeç, është dënuar me burgim të përjetshëm nga Gjykata e Posaçme për vrasjen e Nezirit dhe Gentian Beqirit, baba e bir, në vitin 2012 në Elbasan.
Sipas hetimeve, Florenc Çapja dyshohet të ketë qenë porositësi i vrasjes, ndërsa bashkë me të është dënuar edhe xhaxhai i tij, Ardian Çapja, i njohur për udhëheqjen e një grupi kriminal në Elbasan.
Dëshmia kyçe për këtë çështje ka qenë ajo e të penduarit të drejtësisë, Ervis Bardhi, i cili ka deklaruar se vrasja u porosit nga Çapjat për një shumë prej 50 mijë eurosh.
Bardhi është dënuar me 15 vite burg, ndërsa Olsi Leku, i cili është konsideruar ekzekutor i vrasjes, është dënuar me burgim të përjetshëm. Dy të tjerë, Klajdi Dokoli dhe Etjen Cani, janë dënuar me nga 25 vite burgim secili.
Pas shpalljes së dënimit, SPAK ka vijuar hetimet dhe ka vendosur sekuestro mbi pasuritë e familjes Çapja, duke verifikuar mundësinë e lidhjeve të tyre me krime të tjera në Elbasan.
Raportohet se gjatë seancës Çapja ka kundërshtuar duke pretenduar se dosja e tij është lënë pa asnjë veprim hetimor dhe ai është dënuar “vetëm me dëshminë e Ervis Bardhit”.
Çapja është shprehur më tej se nuk ka qenë asnjëherë përdorues i platformës së enkriptuar të komunikimit SKY ECC.
Florenc Çapja, tani i transferuar në një burg të sigurisë së lartë, do të vuajë dënimin e përjetshëm për krimet për të cilat është shpallur fajtor.
Çapja ishte arratisur në Dubai, ku ka përfituar nga mungesa e një marrëveshjeje ekstradimi mes Shqipërisë dhe Emirateve të Bashkuara Arabe. Pas atentatit, ai dhe Ardian Çapja kishin udhëtuar në Maqedoninë e Veriut për të fshehur gjurmët.
