Policia e Beratit, në bashkëpunim me Prokurorinë e Rrethit, ka finalizuar operacionin policor të koduar “Kontakti”, pas disa ditësh hetime intensive që kishin në fokus goditjen e një rasti të shfrytëzimit për prostitucion.
Si rezultat i këtij operacioni, është arrestuar shtetasi Xh. S., 31 vjeç, banues në Berat, person me të kaluar penale për vepra të rënda si tentativë vrasjeje, dhunë në familje dhe vjedhje.
Ai dyshohet se kishte dhënë me qira apartamentin e tij në lagjen “30 Vjetori”, me dijeni se do të përdorej për veprimtari prostitucioni.
Sipas hetimeve të zhvilluara me metoda speciale hetimore për rreth një javë, rezultoi se ambienti ishte marrë me qira nga dy shtetase me origjinë vietnameze, Th. D. dhe Th.(Th.) D., të dyja 39 vjeçe, të cilat e ushtronin veprimtarinë e paligjshme në këtë apartament. Ato janë vënë gjithashtu në pranga nga policia.
Gjatë kontrollit në banesë, janë sekuestruar pasaportat e dy grave, katër telefona celularë dhe një shumë parash që dyshohet të jenë përfituar nga aktiviteti i paligjshëm.
Hetimet vijojnë për identifikimin e personave të tjerë që mund të jenë të përfshirë në këtë rrjet, ndërkohë që materialet janë referuar Prokurorisë për procedura të mëtejshme ligjore.
