Gjykata e Tiranës ka vendosur në arrest shtëpie ish-futbollistin e Kombëtares, Klodian Duro.
Ky i fundit u arrestua mbrëmjen e 24 marsit, pasi shkoi te banesa e ish-gruas, duke thyer urdhërin e mbrojtjes.
Ish-bashkëshortja e kishte denoncuar disa herë Duron për dhunë fizike dhe psikologjike pas nisjes së procedurave të divorcit.
Ndërsa mbrëmjen e arrestimit, ajo pretendon se Duro nuk pranonte të largohej dhe kishte filluar të godiste derën e apartamentit.
Avokati i ish-futbollistit është shprehur gjatë seancës, se klienti i tij kishte shkuar për të takuar vajzën, por ish-bashkëshortja nuk e kishte lejuar.
“Ata janë në proces divorci dhe çështja ndodhet në Apel. Ish-bashkëshortja nuk e ka lejuar që të takojë vajzën. Më datë 21 vajza ka pasur ditëlindjen dhe ish-bashkëshortja nuk e ka lejuar”, është shprehur avokati.
Nga ana e ish-futbollistit ndërkohë nuk ka ende një reagim zyrtar.
