Mjeku i Qendrës Spitalore të Traumës Fitim Marku i cili u arrestua nga policia pas dyshimeve për korrupsion, mësohet seb është në gjendje të rëndë shëndetësore.
Mësohet se aktualisht mjeku ndodhet në spital, për shkak se ka pësuar ishemi cerebrale dhe në ambientet e spitalit do t’i komunikohet sot masa e sigurisë.
Mjeku anestezist Fitim Marku u arrestua me bujë të madhe ku ishin angazhuar dhe forcat e ndërhyrjes së shpejtë, më 23 shtator pasi dyshohet se ka marrë ryshfet për disa ditë me radhë nga qytetarët në spital.
Uniformat blu e kanë monitoriuar situatën e mjekut Marku pas denoncimeve nga pacientet për abuzim të detyrës nga ana e tij.
Në këtë mënyrë, policia ka futur në spital një pacient (agjent i infiltruar), i cili i ofroi mjekut shumën prej 20 mijë lekësh, të cilën ai nuk e ka refuzuar.
Prokuroria e Tiranës nëpërmjet një deklarate për mediat ka njoftuar se gjatë aksionit të policisë me agjentë të infiltruar te Spitali i Traumës, përveç mjekut anestezistit Fitim Marku, në pranga kanë rënë edhe një kolege e tij mjeke dhe një infermiere.
Prokuroria sqaron se hetimi ka vijuar për disa javë dhe rezulton se këta punonjës të spitalit merrnin shuma të konsiderueshme parash në formë ryshfeti nga pacientët.
