Është tensionuar situata në bulevard ku Vetëvendosje dhe qytetarë të thirrur nga kjo forcë po protestojnë kundër vizitës së Presidentit të Serbisë Aleksandar Vuçiç në Tiranë dhe kundër kreut të serbëve të Bosnjës, Milorad Dodik.
Me slloganin ‘Vuçiç dhe Dodik – Persona Non Grata’, anëtarë të Lëvizjes Vetëvendosje dhe dhjetra qytetarë, janë mbledhur në bulevardin “Dëshmorët e Kombit” në Tiranë për të protestuar kundër vizitës së presidentit të Serbisë, Aleksandar Vuçiç. Qytetarët kanë tentuar të hyjnë në bulevard dhe të marshojnë drejt sheshit Nënë Tereza, por janë shtyrë me forcë nga policia.
Protestuesit kanë akuzuar policinë se po bëhet palë me serbët. Protesta e organizuar nga Lëvizja Vetëvendosje, po bëhet kundër vizitës së dy presidentëve të cilët kanë ardhur në Tiranë më 8-9 maj për procesin e Brdo-Brijuni-t.
Protestuesit do të marshojnë drejt ish-hotel Sheratonit, ku po mbahen takimet në të cilat kanë shkuar Vuçiç dhe Dodik.
Sipas policisë, tubimi është i paligjshëm, por drejtori ekzekutiv i Lëvizjes Vetëvendosje, dega në Shqipëri, Bojken Abazi, e ka kundërshtuar një gjë të tillë.
‘Tubimi juaj është i paligjshëm, shpërndahuni ose do të procedoheni’ – ishte paralajmërimi i policisë, duke u vendosur kordona policor për të mos lejuar kalimin e aktivistëve. Sipas policisë, organizatorët e kësaj proteste do të mbajnë përgjegjësi ligjore.
