Gjenerali në pension Eric P. Wendt është propozuar nga Donald Trump për postin e Ambasadorit të Shteteve të Bashkuara të Amerikës në Shqipëri. Wendt konsiderohet një figurë me peshë në ushtri, me mbi 30 vite eksperiencë në fushën e sigurisë kombëtare dhe operacioneve speciale.
Sipas të dhënave të publikuara, ai ka përfunduar studimet Bachelor në Drejtësi dhe Shoqëri në Universitetin e Kalifornisë në Santa Barbara, si dhe një Master në Çështjet e Sigurisë Kombëtare në Shkollën Pasuniversitare Detare në Monterey, Kaliforni. Wendt ka shërbyer si oficer aktiv në Ushtrinë Amerikane që nga viti 1986. Fillimisht ka kaluar afro pesë vite në Këmbësori, ndërsa që prej vitit 1991 është pjesë e Forcave Speciale si Beretë e Gjelbër.
Pas sulmeve të 11 shtatorit, ai ka mbajtur role të rëndësishme në disa zona të nxehta ndërkombëtare. Ka shërbyer në Indonezi si drejtues ekipi për Komandantin e Komandës së Paqësorit të SHBA-së, si pjesë e Ekipit të Vlerësimit të Situatës në Paqësor. Gjithashtu ka qenë i përfshirë në Operacionin Liria e Qëndrueshme në Filipine, në Mindanao, si dhe në dy misione në kuadër të Operacionit Liria e Irakut dhe Operacionit Liria e Qëndrueshme në Afganistan.
Gjatë karrierës së tij, Wendt ka mbajtur një sërë pozicionesh në strukturat drejtuese, përfshirë edhe detyrën si Ndihmës Kryesor Ushtarak i Sekretarit të Mbrojtjes. Ai ka komanduar në të gjitha nivelet e Forcave Speciale, nga njësitë operative bazë deri te strukturat e avancuara të komandës së operacioneve speciale në teatër.
Gjenerali amerikan zotëron njohuri në gjuhën arabe dhe koreane dhe është vlerësuar me disa çmime ndërkombëtare, mes tyre Kryqi i Artë Gjerman i Nderit për shërbim luftarak në Afganistan, Medalja e Njësisë Presidenciale Filipinase për kontribut në operacionet në Filipine dhe Medalja Cheon Su e Presidentit të Koresë së Jugut.
