Presidenti i zgjedhur i SHBA-së, Donald Trump, ka kërkuar nga Gjykata e Lartë që të shtyjë një afat ligjor që detyron shitjen ose ndalimin e aplikacionit TikTok në SHBA.
Kërkesa synon të mundësojë një “zgjidhje politike” pas inaugurimit të tij si president më 20 janar 2025.
Sipas një ligji të miratuar nga Kongresi në prill, kompania mëmë kineze e TikTok, ByteDance, duhet të shesë platformën deri më 19 janar 2025, ose të përballet me ndalim në mbarë SHBA-në.
Legjislacioni u miratua pas shqetësimeve për sigurinë kombëtare, përfshirë dyshimet se të dhënat e përdoruesve amerikanë mund të bien në duart e qeverisë kineze.
Trump, i cili gjatë fushatës së tij për rizgjedhje premtoi se do të “shpëtonte” TikTok-un, tani po kërkon që Gjykata e Lartë të shtyjë afatin për të lejuar administratën e tij të re të ndjekë një zgjidhje diplomatike.
Në dokumentin e paraqitur më 27 dhjetor, avokatët e tij argumentojnë se Trump është i vetmi me “ekspertizën e duhur në negociata dhe mandatin elektoral” për të zgjidhur çështjen duke adresuar shqetësimet për sigurinë kombëtare.
Kjo përfaqëson një ndryshim në qëndrimin e Trump nga viti 2020, kur si president urdhëroi ndalimin e TikTok dhe kërkoi që ByteDance të hiqte dorë nga asetet e saj në SHBA.
Megjithatë, urdhri i tij u bllokua nga gjykatat dhe më vonë u anulua nga Presidenti Joe Biden, i cili nënshkroi legjislacionin aktual.
Gjykata e Lartë ka planifikuar seancën për argumente gojore më 10 janar 2025, por vendimi për shtyrjen e afatit mbetet i paqartë. TikTok ende nuk ka dhënë një koment mbi zhvillimet e fundit.
Trump, si president, nuk do të ketë kontroll mbi vendimin e Gjykatës së Lartë, por kjo çështje komplekse ligjore mund të vendosë fatin e një prej platformave më të njohura të mediave sociale në SHBA.
