Procedura e trombektomisë, një ndërhyrje e rëndësishme për heqjen e mpiksjes së gjakut në arteriet e trurit, është realizuar për herë të parë në sistemin publik shëndetësor në Spitalin Memorial të Fierit.
Kjo procedurë urgjente synon të rivendosë rrjedhën normale të gjakut, duke minimizuar dëmtimet neurologjike dhe rrezikun për pacientin.
Ministrja e Shëndetësisë, Albana Koçiu, bëri të ditur se ndërhyrja u krye me sukses falë bashkëpunimit të një ekipi multidisiplinar, ku morën pjesë mjekët dr. Umit Gorgulu, dr. Klaudio Disha, dr. Kjanda Elpenoria, dr. Muhammet Karaca dhe dr. Mesut Karatas, si dhe teknikët Tolga Kaya dhe Halil Ibrahim Ozkan.
Sipas Ministrisë, ky sukses është rezultat i implementimit të autonomisë menaxheriale në spital, çka ka mundësuar zgjerimin e gamës së shërbimeve dhe ofrimin e kujdesit cilësor, falë kapaciteteve profesionale dhe pajisjeve të avancuara mjekësore.
