Partia Demokratike ka reaguar pas tritolit të vendosur në banesën e zyrtarit të tyre në Shijak, Ilgner Vora. Në reagimin e saj, Selia Blu thekson se ato e kanë konsideruar akt kriminal dhe se gjenden pranë familjes Vora në këto momente të vështira.
Gjithashtu, PD thekson se ngjarje të tilla kriminale, janë përsëritur shumë kohët e fundit, prandaj organet ligj-zbatuese duhet që të veprojnë me shpejtësi, profesionalizën dhe paanësi për mbrojtjen e rendit dhe sigurisë publike.
Reagimi i Partisë Demokratike:
“Partia Demokratike ka ndjekur me shqetësim informacionin për sulmin me lëndë plasëse në banesën e drejtuesit të Partisë Demokratike në qytetin e Shijakut. Duke i shprehur të gjithë solidaritetin familjes Vora, ne e konsideruar këtë akt kriminal të papranueshëm, të rëndë dhe kërkojmë zbardhjen pa vonesa të kësaj ngjarje dhe vënien menjëherë përpara përgjegjësisë të autorëve.
Ngjarje të rënda si kjo dhe aktet kriminale të kohëve të fundit, janë thirrje ulëritëse për organet ligjzbatuese për të vepruar me shpejtësi, profesionalizën dhe paanësi për mbrojtjen e rendit dhe sigurisë publike, si dhe jetës e pronës së qytetarëve”, shkruhet në reagimin e PD-së.
Ndërsa vetë Ilgner Vora, u shpreh: “Nuk kam pasur përplasje me asnjë, në këtë shtëpi banojnë 12 persona. Ka qenë e papritur, kam dhe bashkëshorten shtatzënë dhe një djalë 2 vjeç”.
