Mëngjesin e hershëm të ditës së sotme, në Shkodër shpërtheu tritoli në një biznes të tipit bar-kafe.
Bëhet e ditur se lënda eksplozive është vendosur në një lokal dhe është shpërthyer nga persona të paidentifikuar. Deri më tani raportohet se si pasojë e shpërthimit ka vetëm dëme materiale pasi në momentin që ka ndodhur ngjarja, lokali ka qenë i mbyllur. Ndërkohë që “Balkan Web” ka siguruar pamjet e momentit kur sasia e eksplozivit i vendoset lokalit në Shkodër.
Nga video shihet se dy persona afrohen dhe në trotuar bëjnë gati lëndën plasëse duke e ndezur. Sipas policisë eksplozivi është prodhuar në mënyrë artizanale. Përballë lokalit autorët e ndezin dhe me të në dorë shkojnë në drejtim të biznesit. Pronari i lokalit ka qenë në gjumë dhe nuk ka dalluar asgjë. Kur është zgjuar rreth orës 5 ka parë dhe dëmet e shkaktuara nga shpërdhimi. Ndërkohë, ai pohoi se nuk ka konflikte me asnjë person dhe se nuk e di se kush mund t’ia ketë vënë tritolin, ndërsa lënda plasëse dyshohet se ka qenë një paralajmërim për të.
NJOFTIMI I POLICISË
Rreth orës 05:50 të mëngjesit të sotëm, shtetasi F. K., 65 vjeç, banues në lagjen “Skënderbeg”, Shkodër, ka njoftuar se kur ka shkuar për të hapur biznesin e tij (bar-kafe), ka konstatuar të thyer xhamin e derës të këtij biznesi.
Nga veprimet paraprake të kryera nga grupi hetimor, dyshohet se para derës së këtij lokali, është hedhur një sasi e vogël lënde plasëse (amonit malor i prodhuar në mënyrë artizanale). Grupi hetimor, në bashkëpunim me Prokurorinë, vijon punën në vendngjarje me qëllim zbardhjen e rrethanave të kësaj ngjarje, si dhe për identifikimin e kapjen e autorit/ëve.
