Ditën e sotme ka shkuar në 609 numri i të prekurve nga COVID-19 në vendin tonë, pasi nga testimet e kryera gjatë 24 orëve të fundit janë shënuar 25 raste të reja.
Rastet e reja janë shënuar 17 në Krujë dhe 8 në Kurbin, teksa për herë të parë në Tiranë që nga nisja e epidemisë nuk ka asnjë të prekur.
Nga ana tjetër, numri i të shëruarve ka shkuar në 345, ku gjatë 24 orëve të fundit janë shëruar edhe 18 pacientë të tjerë
Mbrëmjen e sotme mjeku i njohur infeksionist Tritan Kalo, i ftuar në emisonin “Përballë” ka folur lidhur me situatën e koronavirusit në Shqipëri, duke u shprehur se është i shqetësuar se personat e shëndetëshëm do të infektohen nga ata që ai i cilësoi si “të papërgjegjshëm”.
“Shqetësimi më i madh që kam tani është që hapja të bëhet gradualisht por sjellja e individëve të papërgjegjshëm do bëjë që me veprimet e tyre ta pësojnë njerëzit e përgjegjshëm”, tha mjeku Kalo.
I pyetur nëse Shqipëria është e përgatitur për një valë të dytë koronavirusi, Kalo u përgjigj pozitivisht pasi sipas tij vendi nuk i ka shfrytëzuar të gjitha kapacitetet.
“Jemi, se nuk janë shfrytëzuar strukturat e parapërgatitura nëse shtrihet një gjë e tillë. Rikthimi në shtator, ka diçka që luhatet por në shtator s’ka vetëm Covid nuk është vetëm gripi janë dhe viroza të tjera,”-shtoi mjeku.
