Tre gjyqtarë të infektuar me Covid-19! Mbyllet Gjykata e Kurbinit, e hapur vetëm për…

Google+ Pinterest LinkedIn Tumblr +

Pandemia e Covid-19 ka mbyllur një tjetër institucion në vendin tonë, dhe këtë herë ishte radha e Gjykatës së Kurbinit që të ndërpriste punën për të parandaluar përhapjen e mëtejshme të virusit.

Kjo pasi tre gjyqtarë të këtij  institucioni kanë rezultuar pozitivë me koronavirus duke bërë që të ndërpriten të gjitha proceset gjyqësore, përveç rasteve urgjente.

Të infektuarit janë vetëkarantinuar në shtëpi pasi nuk kanë simptoma të rënda të sëmundjes, ndërsa testimit i janë nënshtruar të gjithë punonjësit e tjerë, duke përfshirë edhe Prokurorinë, e cila ndodhet në të njëjtën godinë. Deri më tani të gjithë të testuarit kanë rezultuar negativ, duke bërë që pjesa më e madhe e tyre të rikthehen në punë.

Duke marrë parasysh se Kurbini ka në dispozicion vetëm 3 gjyqtarë, të cilët tanimë nuk mund të punojnë, Këshilli i Lartë Gjyqësor ka miratuar një listë të gjyqtarëve nga kryeqyteti për të shmangur kolapsin. Deri më 28 shtator, të gjithë dosjet urgjente në Kurbin do t’i shqyrtojë: Shefkie Demiraj, Bedri Qori, Ardian Kalia, Besnik Hoxha, Artan Hajredinaj, Albert Mece, Elisabeta Gjoni, Gert Hoxha dhe Sokol Pasho.

Ndërkohë Ministria e Shëndetësisë dhe Mbrojtjes Sociale ka njoftuar se ditën e sotme janë kryer 810 testime dhe janë konfirmuar 152 raste të reja me Covdi-19, ndërkohë janë shëruar 53 qytetarë duke e çuar në 6668 numrin total të të shëruarve që nga fillimi i epidemisë.

Shpërndaje
Share.

Komento