Prej muajsh koronavirusi ka shqetësuar botën, që po mundohet me të gjitha format ta luftojë dhe të dalë nga kjo betejë me sa më pak dëme.
Teksa situata në disa vende duket nën kontroll, në vende të tjerë panorma duket shumë tragjike.
Ditën e djeshme Organizata Botërore e Shëndetësisë u bëri thirrje qeverive europiane të mos i lehtësojnë masat, ndonëse situata po përmirësohet pasi kontinenti i vjetër vijon të jetë epiqendra e virusit.
Ditët e fundit, në Itali, vendi me numrin më të lartë të viktimave nga COVID-19 në rang botëror, janë ngjallur shpresat se kurba po shkon drejt rënies sepse numri i viktimave është ulur ndjeshëm.
Tashmë një tjetër vend po përballet me një tragjedi: Franca e cila ka shënuar edhe numrin më të lartë të viktimave për 24 orë në të gjithë botën që nga fillimi i epidemisë deri tani.
Më 7 prill, 1,417 shtetas humbën jetën në shtetin francez, teksa deri tani numëron 10,869 të vdekur.
Spitalet u tejmbushën brenda pak ditëve, teksa një numër i madh njerëzish ka vdekur në shtëpi apo qendra të ndryshme të hapura për të prekurit nga koronavirusi.
Në këto kushte mediat e huaja raportojnë se në Francë, personat e prekur nga COVID-19 (kryesisht të moshuar), të cilët ndodhen në fazë shumë të rënduar dhe jo shpresëdhënëse, mund të kërkojnë përdorimin e një ilaçi që do i siguronte atyre një vdekje pa vuajtje.
Ky medikament mund të dërgohet nga punonjësit socialë dhe në shtëpi apo azile.
Bëhet fjalë për rivotrilin, një ilac kundër epilepsisë, që prej disa javësh është autorizuar në Francë kundër vuajtjeve në momentet e fundit për viktimat e COVID-19.
Ky vendim vjen pasi Franca synon të kufizojë shtrimet në spitale, sepse epidemia ka marrë përmasa të paparashikueshme.
Në 28 mars qeveria miratoi një dekret që autorizon përdorimin e rivotrilit, i cili mund të injektohet tek pacienti dhe jashtë spitaleve.
Dekreti i qeverisë franceze u shoqërua me polemika të shumta, ndonëse përdorimi i rivotrilit është në përputhje me ligjin ‘Kleis-Leonetti’ të 2016-ës, që mbron të drejtën për një vdekje me dinjitet dhe pa vuajtje.
Ky ligj miraton përdorimin e ilaçeve me bazë morfine, për të lehtësuar vuajtjen e të sëmurëve me kancer, por dekreti i 28 marsit shtrin këtë përdorim tek pacientët e prekur nga COVID-19 që gjendjen në azile apo në banesat e tyre.
Sindikata e Mjekëve të Rinj i ka kërkuar këshillit të shtetit të pezullojë dekretin, por qeveria këmbëngul se i vetmi ndryshim është që tashmë ilaçi mund të përdoret dhe në shtëpi dhe sipas saj situata e rëndë e pandemisë ka sjellë në këtë vendim, por gjithnjë nën kontrollin mjekësor.
