Mbrëmjen e djeshme një tragjedi ndodhu ne Tetovë. Një zjarr ka rënë në një spital ku po trajtoheshin pacientë me COVID-19. Autoritetet bënë me dije se fatkeqësisht kanë humbur jetën 14 qytetarë, ndërsa mundësia që bilanci tragjik të përkeqësohet nuk mungon.
Ditën e sotme në një lidhje telefonike për “ABC-ja e mëngjesit”, ka folur gazetari Seladin Xhezairi i cili ka thënë se dyshohet se ka shpërthyer një bombol gazi. Sipas gazetarit më pas zjarri është përhapur me shpejtësi në të gjithë spitalin. Ai bën me dije se zjarri ka rënë rreth orës 21:02, ndërsa raportohet se në ambientet e spitalit kanë qenë rreth 26 persona.
Xhezairi ka sjell në vëmendje edhe një herë ngjarjen që ka ndodhur më 23 gusht në këtë spital, ku u dëmtuan tubat e oksigjenit dhe të ajrit të kondensuar por policia ende nuk e ka zbardhur çështjen.
“Burime të brendshme dhe dëshmitarë okular tregojnë se ka pasur një zjarr të madh dhe nuk u ka dhënë hapësire të ikin. Zjarri ka qenë i papritur. Dyshohet se kanë shpërthyer bombolat e gazit. Shpërthimi ka ndodhur diku rreth orës 21:02. Deri në shpërthim raportohet se ka pasur 24 apo 26 të punësuar në këtë spital.
Më 23 gusht ka pasur një përpjekje sabotimi dhe ka pasur dy dëmtime të tubave që çojnë oksigjen dhe ajër në këtë spital. Nuk është zbardhur se kush dhe pse u dëmtuan dy tubat. Në atë kohë numri i viktimave do të kishte qenë më i lartë. Janë disa viktima dhe nuk dihet se sa do shkojë bilanci. Nuk mbahet mend që një tragjedi e tillë të ketë ndodhur.” – tha ai.
