Një ngjarje e rëndë ka tronditur zonën e Ulëzës, ku trupi i pajetë i 23-vjeçarit Renis Dobra është gjetur pranë liqenit të Shkopetit.
Të dhënat paraprake nga grupi hetimor ngrenë dyshime të forta se i riu është ndjekur nga qyteti i Burrelit deri në fshatin Madhesh nga një automjet tjetër.
Edhe pse janë siguruar pamje filmike nga kamerat e sigurisë në Burrel, mungesa e kamerave përgjatë segmentit ku ka ndodhur ndjekja ka penguar identifikimin e autorëve.
Sipas hetuesve, dyshohet se Dobra është rrëmbyer, dhunuar dhe më pas është hedhur nga një lartësi së bashku me automjetin e tij, që ende nuk është gjetur dhe vijon të kërkohet në liqen.
Trupi i pajetë u zbulua në një zonë të mbuluar me shkurre, rreth 10 metra larg bregut.
Renis Dobra, banues në fshatin Zenisht të Burrelit, nuk rezulton të ketë pasur probleme me ligjin, ndërsa familjarët e tij kanë mohuar të kenë dijeni për ndonjë konflikt apo kërcënim ndaj tij.
Motivi i ngjarjes mbetet ende i paqartë, ndërsa autoritetet janë duke vijuar me hetimet për zbardhjen e plotë të rrethanave.
