Me 23 nëntor një aksident tragjik në Bullgari, nga djegia e autobusit turistik të Besa Trans ndërruan jetë 45 persona si dhe mbetën të plagosur 7 të tjerë.
Shërbimi hetues nacional bullgar e mbylli rastin për aksidentin në autostradën Struma në të cilin humbën jetën 45 persona, deklaroi për BGNES shefi i shërbimit, Borisllav Sarafov, ndërsa përgjegjësia për aksidentin është e shoferit i cili e drejtonte autobusin.
“Shkaku është humbja e kontrollit ndaj autobusit nga ana e shoferit. Por edhe shpejtësia e madhe, të themi, joadekuate, por jo edhe mbi sa lejohet”, tha Sarafov.
Shefi i Shërbimit hetues nacional bullgar për BGNES shton se mbetet të bëhet urdhër gjyqësor në Maqedoninë e Veriut dhe të njoftohen të afërmit e viktimave se kanë të drejtë të bëjnë mbikëqyrje në materialeve.
Më 23 nëntor të vitit 2021 në orët e hershme të mëngjesit, autobusi i kompanisë “Besa Trans” i cili nga Stambolli kthehej me turistë, goditi rrethojën e autostradës Struma, te fshati Bosnek, me çka humbën jetën 45 persona.
Më herët hetuesit kanë zbuluar se bankinat anës rrugës ku ndodhi aksidenti kanë qenë të vendosura gabimisht, pasi janë restauruar nga dëmtimi i një aksidenti të mëparshëm në atë vend.
Ekspertiza e re i është dorëzuar Prokurorisë në Sofje, duke nxjerr në pah një pistë të re hetimi mbi shkaqet e ngjarjes tragjike.
“Nga inspektimi është konstatuar se bankinat mbrojtëse të rrugës nuk ishin instaluar sipas standardeve. Në zonën e aksidentit kanë ndodhur aksidente të shumta, gjatë të cilave janë dëmtuar rrethojat mbrojtëse. Në këtë rast, në shiritin e ndarjes së mesme mund të shohim se ka një riinstalim të objektit. Duhet të ketë pasur një aksident të mëparshëm në të njëjtën zonë. Mbajtësi i bankinës është montuar gabimisht me dy vida në vend të katër. Kjo është arsyeja pse është thyer rrethoja mbrojtëse pavarësisht shpejtësisë së ulët me të cilën ka goditur autobusi. Është konstatuar se mungojnë tabelat, si dhe ka shenja të dëmtuara”, kanë thënë nga Instituti për Siguri Rrugore në Bullgari.
