Një ngjarje e rëndë ka ndodhur në zonën bregdetare të “Rana e Hedhun” në Shëngjin, ku katër të rinj që kishin hyrë në det janë përballur me dallgët dhe rrymat e forta.
Sipas informacioneve paraprake, të rinjtë janë marrë nga dallgët, ndërsa dy prej tyre dyshohet se kanë humbur jetën. Dy persona të tjerë janë nxjerrë nga deti dhe raportohet se ndodhen në gjendje të rëndë shëndetësore.
Në vendngjarje kanë mbërritur forcat e emergjencës, policia dhe ekipet e kërkim-shpëtimit, të cilat po punojnë për zbardhjen e plotë të rrethanave të ngjarjes.
Deri në këto momente nuk ka një njoftim zyrtar nga autoritetet për identitetin e viktimave apo detaje të tjera lidhur me incidentin.
Hetimet vijojnë, ndërsa pritet një reagim zyrtar me më shumë informacion në orët në vijim.
