Një operacion është duke u zhvilluar prej orëve të para të mëngjesit për ekzekutimin e 15 urdhër arresteve të lëshuara nga Anti-Mafia në Itali.
Ky operacion, që ka si epiqendër qytetin Bari, është i fokusuar ndaj një organizate kriminale të përfshirë në trafikun ndërkombëtar të drogës.
Bëhet fjalë për një rrjet të strukturuar mirë për importimin dhe shpërndarjen e drogës ndërmjet Shqipërisë dhe Italisë.
Të dyshuarit menaxhonin transportin e sasive të mëdha kokainë dhe marijuanë përmes rrugëve detare, duke përdorur mjete të avancuara për të shmangur kontrollin.
Pas mbërritjes në Itali, droga shpërndahej në disa rajone të ndryshme.
Gjatë operacionit, u zbuluan gjithashtu aktivitete të pastrimit të parave, që mbuloheshin nga veprimtari tregtare.
Për këtë operacion mësohet se kanë bashkëpunuar edhe autoritetet shqiptare ndërkohë që detaje pritet të bëhen publike në orët në vijim.
