Një tjetër sulm kibernetik ka ndodhur në vend ditën e sotme, Shqipëria ka rënë sërish pre e një sulmi në sistemin TIMS.
Lajmi është bërë i ditur nga kryeministri Edi Rama, i cili nëpërmjet një postimi një Twitter, ka njoftuar se sulmi u regjistrua mbrëmjen e djehsme, ndërsa sipas tij sërish pas sulmit qëndron shteti iranian.
Më herët kryeministri Rama njoftoi shkëputjen e marrëdhënieve diplomatike të Shqipërisë me shtetin islamik të Iranit, gjë që çoi dhe në dëbimin e diplomatëve të ambasadës iraniane në Tiranë.
Postimi i kryeministrit Rama:
Një tjetër sulm kibernetik nga të njëjtët agresorë, tanimë të ekspozuar dhe dënuar prej vendeve aleate e mike të Shqipërisë, është shënuar mbrëmë mbi sistemin TIMS! Ndërkohë vazhdojmë punojmë përditë pa orar me aleatët për t’i bërë të papenetrueshme sistemet tona digjitale.
Si rezultat i sulmi kibernetik ndaj sistemit TIMS është pezulluar puna në Portin e Vlorës.
Raportohet se sportelet nuk po punojnë, teksa qytetarët po presin në radhë të gjata. Pas disa orëve pezullim, autoritetet kanë filluar punën duke bërë regjistrimin e emrave me shkrim dore. Sistemi TIMS në Shqipëri ka rënë pre e një sulmi kibernetik nga Irani. Për pasojë, sistemi nuk ka punuar në të gjitha pikat e kalimit kufitar të vendit tonë, duke shkaktuar radhë të gjata.
