TikTok është rikthyer në dyqanet e aplikacioneve të Apple dhe Google pas vendimit të presidentit amerikan, Donald Trump, i cili ka shtyrë ndalimin e aplikacionit kinez dhe ka siguruar kompanitë e teknologjisë se nuk do të gjobiten për lejimin e shkarkimit të tij.
Aplikacioni, i përdorur nga pothuajse gjysma e amerikanëve, ishte ndaluar për një periudhë të shkurtër muajin e kaluar, para se të hynte në fuqi një ligj më 19 janar, i cili kërkonte që pronari i TikTok-ut, ByteDance, ta shesë atë për arsye sigurie kombëtare, ose të përballet me një ndalim.
Më pas, Trump nënshkroi një urdhër ekzekutiv që shtyu për 75 ditë zbatimin e ndalimit, duke mundësuar vazhdimin e operacioneve të TikTok-ut në SHBA.
Pas këtij vendimi, aplikacioni rifilloi shërbimin, por Google e hoqi atë nga Google Play dhe Apple nga App Store.
Sidoqoftë, TikTok njoftoi se ishte rikthyer për shkarkim në këto dy dyqane aplikacionesh. Kjo vonesë mund të ketë ardhur për shkak të pritjes së garancive nga Google dhe Apple se nuk do të ndëshkoheshin për shpërndarjen e aplikacionit. Urdhri ekzekutiv i Trump-it ka siguruar që këto kompani të mos përballen me gjobë.
Në vitin 2024, TikTok pati mbi 52 milionë shkarkime, sipas Sensor Tower, me 52% të shkarkimeve nga App Store i Apple dhe 48% nga Google Play.
Ligji që kërkon shitjen e TikTok-ut në SHBA u nënshkrua nga Joe Biden në prill të vitit të kaluar, duke u fokusuar në shqetësimet për sigurinë kombëtare dhe mundësinë që Kina mund të përdorte aplikacionin për spiunazh ndaj përdoruesve amerikanë.
Ky ligj i jep qeverisë të drejtën të ndalojë ose të kërkojë shitjen e aplikacioneve të tjera në pronësi kineze.
