Një 3-vjeçar ka humbur gjurmët në Durrës. Policia ka nisur kërkimet për vogëlushin i cili jeton vetëm me të ëmën pasi, babai ndërroi jetë një vit më parë në një aksident rrugor.
Për herë të fundit i mituri ka qenë në banesën e gjyshërve të tij nga ana e babait, ku shkonte çdo fundjavë për të qëndruar për disa orë si zakonisht, por nuk është kthyer më. Në këto kushte, nëna i fëmijës është detyruar t;i drejtohet dyerve të policisë për ta gjetur.
Sakaq, në Komisariatin e Durrësit janë shoqruar gjyshi i djalit, 58-vjeçari Rexhep Gjuni, ndërsa është shpallur në kërkim bashkëshortja e tij. Po ashtu është ndaluar dhe një person tjetër, i cili dyshohet se ka dijeni për vendndodhjen e djalit të mitur.
58-vjeçari është marrë në pyetje nga policia ku ka pretenduar se fëmijën e ka dërguar tek disa të afërm në Kukës. Por në vendin e pretenduar nuk u gjet asnjë gjurmë e të voglit. Dyshimet nga ana e hetuesve janë se i mituri mund të jetë dërguar jashtë shtetit dhe për këtë arsye kanë nisur kërkimet edhe në pika kufitare.
Nëna e të miturit e shqetësuar për gjendjen e të voglit të saj ka bërë apel që Shteti të ngrihet në këmbë për ta gjetur, ndërsa ka pretenduar se nuk e ka ndaluar kurrë që ai të shkojë të gjyshërit.
“Jam e shqetësuar. Nuk e di ku ndodhet fëmija im. Nuk e di nëse është mirë. Kërkoj nga Policia që të më gjejë djalin. Nuk e di pse ka ndodhur e gjithë kjo pasi unë nuk e kam penguar kurrë fëmijën që të shkonte dhe të takonte gjyshërit e tij,”-ka deklaruar nëna e të miturit.
