Analisti i njohur Mentor Kikia ka bërë thirrje për bojkot masiv ndaj kompanisë që importoi mishin e kontaminuar me salmonelë, duke theksuar se ndëshkimi më i fortë duhet të vijë nga vetë konsumatorët. Deklarata e tij vjen pas zbulimit të 27 tonëve mish pule të kontaminuar nga Brazili, të importuar nga kompania AMGFood, e cila tashmë është në qendër të një hetimi të gjerë.
Duke marrë shkas nga thirrja e Mentor Kikisë, ne gjithashtu i bëjmë thirrje të fortë të gjithë qytetarëve të bojkotojnë kompanitë që rrezikojnë shëndetin publik. Është e papranueshme që në një kohë kur indiferenca qeveritare ndaj qytetarëve ka arritur majat, institucionet heshtin e spitalet vuajnë nga mungesa e ilaçeve, kompani të papërgjegjshme hedhin në treg produkte që rrezikojnë jetën e qytetarëve.
Dështimi i institucioneve përgjegjëse është tashmë i plotë. Tre inspektorë të AKU-së, të cilët lejuan qarkullimin e këtij mishi të rrezikshëm, po hetohen për shpërdorim detyre. Ndërkohë, pronari i kompanisë AMGFood, Arben Goxha, është shpallur në kërkim nga policia. Në vend që të bashkëpunojë me autoritetet dhe të marrë përgjegjësi për veprimet e veta, ai ka zgjedhur të fshihet.
Ky rast nxjerr në pah dështimin total të sistemit të kontrollit të ushqimit në vend. Institucionet përgjegjëse kanë dëshmuar se nuk janë në gjendje të mbrojnë shëndetin e qytetarëve. Mungesa e transparencës institucionale vetëm e përkeqëson situatën, duke krijuar një tymnajë të dendur rreth skandalit.
Përballë këtij realiteti të hidhur, ku organet shtetërore nuk ushtrojnë kontrollet e duhura dhe janë të gatshme të rrezikojnë shëndetin e qytetarëve, zgjidhja e vetme mbetet revolta qytetare. Pa një reagim të fortë nga konsumatorët, nuk mund të presim ndryshim nga një sistem që dështon çdo ditë në mbrojtjen e interesit publik.
Bojkoti i kompanive që shkelin rregullat dhe rrezikojnë shëndetin publik është hapi i parë drejt ndryshimit. Vetëm përmes një veprimi të organizuar qytetar mund të detyrojmë bizneset të respektojnë standardet e sigurisë ushqimore dhe institucionet të kryejnë detyrat e tyre.
Të mos harrojmë se bëhet fjalë për 27 tonë mish të kontaminuar, një sasi që mund të kishte shkaktuar probleme serioze shëndetësore për mijëra qytetarë. Është koha që qytetarët të ngrihen dhe të refuzojnë produktet e kompanive që i trajtojnë si viktima të një sistemi të korruptuar dhe jofunksional.
