Florjan Binaj bëri thirrje për përgjegjësi të përbashkët dhe një qasje të re bashkëpunimi gjatë fjalës së tij të shkurtër në takimin e opozitës, duke theksuar nevojën për të lënë pas ndasitë dhe për t’u përqendruar te pikat që bashkojnë shoqërinë.
Duke u shprehur i privilegjuar për pjesëmarrjen në takim, Binaj vuri në dukje se përgjegjësia për gjendjen aktuale nuk i takon vetëm një grupi të caktuar, por të gjithëve, përfshirë edhe qytetarët që e ndjekin nga shtëpia. Sipas tij, mungesa e veprimit të mjaftueshëm ka qenë e përhapur dhe ka ndikuar në ngecjen e proceseve.
Në qendër të fjalës së tij, Binaj theksoi se shoqëria ka humbur kohë duke u përqendruar te dallimet mes individëve dhe grupeve, në vend që të ndërtojë mbi ngjashmëritë dhe interesat e përbashkëta. Kjo qasje, sipas tij, ka penguar bashkëpunimin dhe progresin.
Ai propozoi si zgjidhje pranimin e ndërsjellë të dallimeve dhe bashkëpunimin pa kushte paraprake, duke bërë thirrje për heqjen dorë nga pritshmëritë që palët të përshtaten sipas modeleve të njëra tjetrës.
Florjan Binaj deklaroi:
“Më falni. Do ju harxhoj vetëm 30 sekonda. Në radhë të parë, shumë faleminderit që më keni bërë pjesë të këtij takimi. Ndihem vërtet i privilegjuar. E dyta, unë mendoj që arsyeja pse jemi në këtë takim është sepse të gjithë ne, edhe ata që na shohin nga shtëpia, kush më shumë, kush më pak, nuk kemi bërë mjaftueshëm. Dhe gjatë gjithë kësaj kohe kemi, kemi harxhuar kohë duke, duke parë nga njëri tjetri jo ku ngjajmë, po ku dallojmë. Dhe në këtë kohë që ka ardhur, mendoj se gjëja më e rëndësishme për të bërë është që për ta pranuar njëri tjetrin ashtu siç jemi të ndryshëm dhe mos të presim nga njëri tjetri që unë do bashkëpunoj me ty po more ti formën time ose unë formën tënde e të tjera me radhë.”
