Është thelluar bilanci i viktimave nga Covid-19 në Kosovë, pasi një paciente ka ndërruar jetë ditën e sotme në Klinikën Infektive.
Lajmi është bërë i ditur përmes një njoftimi nga Ministria e Shëndetësisë së Kosovës, që informon se viktima është një 63-vjeçare nga Rahoveci dhe kishte një javë e shtruar në Klinikën Infektive.
Sipas njoftimit, pacientja kishte edhe sëmundje të tjera shoqëruese, teksa tashmë ka shkuar në 29 numri i viktimave.
Sipas të dhënave të djeshme në Kosovë janë identifikuar në total 895 raste pozitive 657 prej të cilëve janë shëruar.
Sakaq, pritet edhe përditësimi i të dhënave për ditën e sotme, por vlen të theksohet se 24 orët e fundit situata është përkeqësuar sepse numri i të prekurve dje u 3-fishua, teksa u shëruan vetëm 2 persona.
Njoftimi i plotë:
NJOFTIM NGA KLINIKA INFEKTIVE-QKUK
Prishtinë, 12 maj 2020
Klinika Infektive ka njoftuar se sot ka përfunduar me vdekje pacientja H.E.(1957) nga Komuna e Rahovecit.
Pacientja ishte pranuar në Klinikën Infektive me datën 03.05.2020 në gjendje të rëndë, paraprakisht e konfirmuar për Covid-19 dhe me disa sëmundje të tjera shoqëruese.
Kjo është vdekja e 29 në nivel vendi nga Covid-19 dhe e tetëmbëdhjeta në Klinikën Infektive nga kjo sëmundje.
