Një tërmet i fuqishëm me magnitudë 6.3 ballë ka tronditur Afganistanin verior në orët e para të mëngjesit të së hënës, duke shkaktuar të paktën 20 viktima dhe mbi 360 të plagosur. Autoritetet paralajmërojnë se bilanci mund të rritet ndërsa vijojnë operacionet e shpëtimit në zonat më të prekura.
Sipas Shërbimit Gjeologjik të Shteteve të Bashkuara (USGS), epiqendra e tërmetit u regjistrua rreth 35 kilometra nga qyteti Khulm, pranë Mazar-e-Sharif, në provincën Balkh, me një thellësi prej 10 kilometrash. Lëkundjet u ndjenë deri në Kabul, edhe pse kryeqyteti ndodhet qindra kilometra larg.
Ngjarja ndodhi rreth orës 01:00 sipas orës lokale, ndërsa USGS e klasifikoi me nivel alarmi “portokalli”, që nënkupton rrezik të lartë për viktima dhe dëme të mëdha materiale. Rajoni u godit më pas nga të paktën pesë pasgoditje, më e forta me magnitudë 5.2 ballë.
Zëdhënësi i Ministrisë së Shëndetësisë të qeverisë talebane, Sharafat Zaman Amarkhail, deklaroi se “të gjitha spitalet janë udhëzuar të jenë plotësisht të përgatitura për të ofruar ndihmën e nevojshme”, ndërsa ekipet e shpëtimit po kërkojnë mes rrënojave për të mbijetuar.
Tërmeti shkaktoi ndërprerje të energjisë elektrike dhe dëme të konsiderueshme në provincën Balkh. Një pjesë e Xhamisë Blu, monument i shekullit të 15-të dhe një nga vendet më të shenjta të Afganistanit në Mazar-e-Sharif, është raportuar e dëmtuar. Kjo xhami besohet të jetë vendi i varrimit të kushëririt dhe dhëndrit të Profetit Muhamed.
Afganistani ndodhet në një zonë me aktivitet të lartë sizmik, në kryqëzimin e pllakave tektonike euroaziatike dhe indiane. Vendi është goditur disa herë nga tërmete shkatërruese vitet e fundit. Në gusht 2025, një tërmet me magnitudë 6.0 mori jetën e mbi 2,200 personave në lindje të vendit, ndërsa në tetor 2023 më shumë se 4,000 njerëz humbën jetën nga një tjetër tërmet i fuqishëm në Afganistanin perëndimor.
Autoritetet vendase dhe agjencitë ndërkombëtare të emergjencës po ndjekin nga afër situatën, ndërsa frika për pasgoditje të reja mbetet e madhe.
