Një tërmet me magnitudë 6.1 goditi të dielën provincën perëndimore të Balıkesir, duke shkaktuar vdekjen e një 81-vjeçari dhe plagosjen e 29 personave të tjerë.
Viktima, Nihat Onbas, humbi jetën në spital pas nxjerrjes nga rrënojat e një ndërtese trekatëshe që u shemb gjatë tërmetit. Bashkëshortja e tij, Hamide Onbas, mbijetoi me një frakturë në krah.
Ministri i Brendshëm turk, Ali Yerlikaya, bëri me dije se asnjë nga të plagosurit nuk është në gjendje kritike.
Ndërkohë, sipas Ministrisë së Shëndetësisë, 18 prej tyre janë lënë të lirë nga spitali, ndërsa 11 vazhdojnë të trajtohen, shumica si pasojë e lëndimeve të marra gjatë evakuimit nga ndërtesat.
Tërmeti u regjistrua në orën 19:53 me orën lokale, me një thellësi fokale prej 10 kilometrash, sipas të dhënave të Autoritetit Turk për Menaxhimin e Fatkeqësive.
Goditja u ndje në një zonë të gjerë që përfshinte rajonin e Marmarasë, Stambollin, si dhe bregdetin lindor dhe verior të Egjeut.
Në zonën e Balıkesirit dhe fshatrave përreth, u shembën 16 ndërtesa, përfshirë katër banesa dhe 12 objekte të braktisura, pa shkaktuar viktima shtesë. AFAD raportoi gjithashtu të paktën 20 lëkundje pasuese, me magnitudën më të madhe prej 5.0 ballë.
Në terren janë angazhuar 319 ekipe shpëtimi, ndërsa janë raportuar 24 dëmtime materiale përmes qendrës emergjente.Kjo goditje e re vjen ndërkohë që Turqia ende po rikuperohet nga tërmeti katastrofik i shkurtit 2023, ku humbën jetën të paktën 53,000 njerëz, kryesisht në qytetin Antakya.
