Një 42-vjeçar është vënë në pranga në Portin e Durrësit, pasi u kap duke transportuar me kamion një sasi të konsiderueshme vere dhe shampanje të padeklaruara.
Sipas Policisë Kufitare, gjatë kontrollit të ushtruar në hyrje të territorit shqiptar, në mjetin e drejtuar nga shtetasi Sh. G., banues në Durrës, u zbuluan disa arka me pije alkoolike që nuk ishin të shoqëruara me dokumentacion ligjor apo fatura blerjeje.
Hetimet paraprake tregojnë se mallrat kishin si destinacion tregun vendas dhe synohej të futeshin pa u deklaruar në doganë.
Policia ka sekuestruar automjetin, sasinë e mallrave, pasaportën dhe telefonin celular të të ndaluarit, ndërsa vijojnë hetimet për zbardhjen e plotë të rastit.
Njoftimi i policisë
“Finalizohet operacioni policor i koduar “Qelqi”
Tentoi të fuste me kamion, në Shqipëri, verë e shampanjë pa i deklaruar në doganë, arrestohet 42-vjeçari.
Sekuestrohen mallrat dhe kamioni, pasaporta dhe celulari i të arrestuarit.
Në vijim të kontrolleve intensive në hyrje/dalje, nga shërbimet e Policisë Kufitare të Portit të Durrësit, në bazë të analizës së riskut dhe kundër paligjshmërive në kufi, u krye kontroll në hyrje të Shqipërisë, në kamionin që drejtonte shtetasi Sh. G., 42 vjeç, banues në Durrës.
Nga kontrolli në automjet u konstatun arka me verë dhe shampanjë, të dyshuara të kontrabanduara me qëllim shitjen në Shqipëri, sepse nuk ishin të pajisura me fatura blerjeje.
Shtetasi Sh. G. synonte t’i fuste mallrat në Shqipëri, pa i deklaruar në PKK, konform ligjit.
Në përfundim të veprimeve procedurale për këtë rast, në kuadër të operacionit “Qelqi”, 42-vjeçari u arrestua në flagrancë dhe mallrat u sekuestruan me cilësinë e provës materiale.
Materialet procedurale iu referuan Prokurorisë së Durrësit, për veprime të mëtejshme”. thuhet në njoftim.
