Gjykata e Elbasanit ka vendosur masën e sigurisë “detyrim paraqitje” dhe ndalim të daljes jashtë shtetit për një efektiv policie, i cili akuzohet se ka tentuar të pengojë hetimet në një çështje ku është i përfshirë i vëllai i tij, Edison Pemaj. Ky i fundit u arrestua më herët për veprimtari të paligjshme që përfshijnë fajde dhe kanosje.
Polici, me detyrë në Patrullën e Përgjithshme në Komisariatin Nr. 4 të Tiranës, akuzohet për veprën penale “Veprime që pengojnë zbulimin e së vërtetës”. Sipas njoftimit të Agjencisë së Mbikëqyrjes Policore, ai, në bashkëpunim me një tjetër shtetas, E.D., ka tentuar të fshehë prova materiale me qëllim favorizimin e të arrestuarit. Edhe ndaj shtetasit E.D. është vendosur e njëjta masë sigurie.
Nga ana tjetër, Edison Pemaj, i cili shërbente si Specialist për Hetimin e Krimeve në Seksionin e Narkotikëve në Policinë e Elbasanit, u arrestua më 5 korrik. Hetimet zbuluan se ai u jepte persona të ndryshëm para me fajde dhe më pas ushtronte presion e kërcënime për rikthimin e shumave me interesa të larta. Gjatë operacionit ndaj tij, policia sekuestroi edhe pesë automjete të dyshuara si të përfituara nga aktiviteti kriminal.
Njoftimi i AMP:
Agjencia e Mbikëqyrjes Policore (Rajoni Elbasan – Korçë) ka ekzekutuar vendimin e Gjykatës së Shkallës së Parë të Juridiksionit të Përgjithshëm Elbasan e cila ka caktuar masat e sigurimit personal me karakter ndalues “Ndalim i daljes jashtë shtetit” dhe “Detyrim për t’u paraqitur në Policinë Gjyqësore” ndaj një punonjësi policie dhe një shtetasi të dyshuar për kryerjen e veprës penale “Veprime që pengojnë zbulimin e së vërtetës”.
– Inspektor E. P., me detyrë Trupë Shërbimi / Oficer i Patrullës së Përgjithshme në Komisariatin e Policisë Nr. 4 Tiranë.
– Shtetasi E. D., banues në Tiranë
Në vijimësi të hetimeve të thëlluara në kuadër të operacionit “Last rent”, ka dyshime se punonjësi i policisë në bashkëpunim me shtetasin e sipërpërmendur, kanë tentuar të fshehin prova materiale lidhur me ndalimin me datë 05.07.2025 të punonjësit të policisë E. P., (vëllai i punonjësit E. P.) i dyshuar për veprën penale “Shtrëngim me anë të kanosjes ose dhunës për dhënien e pasurisë”.
AMP mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të abuzimit apo shkeljes së ligjit nga ana e punonjësve të strukturave, duke telefonuar në numrin e gjelbër 0800 9090, ose duke dërguar Email në adresën [email protected].
