Tensionet në kampin MEK, Peleshi: Ne do të reagojmë në çdo moment që cënohet siguria kombëtare
Ministri i Mbrojtjes, Niko Peleshi ka reaguar në lidhje me tensionet që pati midis policisë dhe muxhahedinëve në qendrën Ashraf në Manzë të Durrësit. Sipas ministrit Peleshi ndërhyrja e policisë ka qenë konform gjithë ligjeve të shtetit shqiptar dhe ne nuk mund të lejojmë krijimin e Ishujve të vegjël ku tejkalohet ligji shqiptar. Peleshi theksoi se do të reagohet sa herë që cënohet siguria kombëtare.
“Normalisht që në këtë komunitet do të vijojmë të jeni vend pritës dhe do të plotësojmë gjithë angazhimet humanitare që kemi ndërmarrë por pa shkelur asnjë ligj të shtetit shqiptar”, ka thënë ai. Ndërkohë në lidhje me sulmin kibernetik tek të dhënat e shqiptarëve një vit më parë Peleshi është shprehur se nuk ka justifikim për orkestrimin që bëri Irani dhe që sipas tij ndodhi edhe ndërprerja e marrëdhënieve diplomatike mes dy vendeve.
“Ne do të reagojmë në çdo moment që cenohet siguria kombëtare. Pas atij sulmi jo të suksesshëm nga ana e Iranit shteti shqiptar ka ndërmarrë disa masa në sigurinë kibernetike për të mbrojtur të dhënat tona dixhitale. Dekurajojmë çdo forcë desktruktive që ti afrohet Shqipërisë, pasi Shqipëria është vend i NATO, ne reagojmë me trimëri dhe forcë kur cenohet siguria kombëtare”, është shprehur ndër të tjera ministri.
