Kancelari gjerman, Olaf Scholz gjatë një konference për mediat në Berlin foli për tensionet e fundit në Kosovë dhe në Serbi. Ai tha se nga këto tensione dëshmohet se sa e rëndësishme është prania e misionit paqeruajtës të NATO-s në Kosovë, KFOR.
Scholz u shpreh ndër të tjera se shteti i tij mbështet misionin e KFOR-it në veri të Kosovës, i cili ka rritur praninë ushtarake në rast ndezjen e ndonjë konflikti tjetër.
“NATO është garantues i sigurisë në Ballkanin Perëndimor, në Kosovë përmes KFOR-it. Gjermania merr pjesë në këtë mision përmes forcave të armatosura. Tensionet në ditët e fundit kanë ilustruar se sa e rëndësishme është kjo prani dhe që KFOR-i duhet të jetë në pozicion që të reagojë në mënyrë të duhur ndaj të gjitha zhvillimeve”, tha kancelari gjerman.
Aktualisht, në kuadër të KFOR-it janë 4.353 trupa, 70 prej të cilëve janë nga Gjermania.
