Një familje në rrugën “Vasil Shanto” në Tiranë, është konfliktuar me policinë dhe INUV-in gjatë ditës së sotme, për të mbrojtur banesën e tyre e cila preket nga projekti i një rruge.
Pjesëtarët e kësaj familjeje kanë hipur mbi tarracën e shtëpisë duke hedhur tjegulla në drejtim të uniformave blu. Kryefamiljari ka deklaruar se duan fillimisht kompensimin e pronës së tyre, e më pas INUV të vijojë me shembjen.
Kujtojmë se ditën e sotme INUV ka nisur një aksion për shembjen e një banese në rrugën “Vasil Shanto”, por ka hasur në kundërshtinë e banorëve të banesës.
3 anëtarët e kësaj familjeje kanë hipur mbi tarracën e shtëpisë duke mos lejuar fadromën e INUV që të shembë banesën e tyre.
“Ca policë, hale m*ti. Më sill letra atë bëj. Të më japë lekët, le të bëhet rruga, po të më japin lekët. Po s’më dhanë lekët, ku të shkoj unë, në hënë? E kemi me hipotekë, legalizim”, u ka thënë një prej banuesve të shtëpisë efektivëve të policisë dhe INUV-it.
Mësohet se plani për ndërtimin e një rruge në këtë zonë, prek 2 banesa, ku njëra prej të cilave është shembur më parë. Ndërkohë familjarët e banesës tjetër kanë bërë rezistencë dhe si pasojë aksioni i INUV është pezulluar.