Shoqërimi i gjyqtares Mimoza Margjeka për në GJKKO është shoqëruar me tensione dhe përplasje verbale mes saj dhe efektiveve të policisë.
Gjyqtarja Margjeka u shfaq para kamerave e irrituar, duke u kërkuar llogari uniformave blu për urdhrin e gjykatës për shoqërimin e saj, ndërsa ka pretenduar se është i paligjshëm.
Sipas gjyqtares, ndaj të cilës rëndon akuza e dyshimit për korrupsion, policia e ka patur të paqartë se në cilën gjykatë do të shoqërohej dhe deklaroi me tone të ashpra se e kanë lënë duke pritur për 5 orë në bodrumin e gjykatës së Shkallës së parë në Tiranë.
“Kam pesë orë që pres policinë të më shoqërojë. Pse nuk vijnë të më marrin, kanë harruar. Nuk ka shkresë shoqërimi. Unë s’kam asgjë, këto janë stisje të shtetit. Një police femër s’e kishit dhe më futët në bodrum të gjykates. S’u vjen turp. Unë nuk jam njeri ordiner. S’ka urdhër shoqërimi. Harrojnë gjyqtarin që e bënë zhele dy ditë, kot pa asnjë arsye. Qëllimi është me diskretit njerëzit, jo ore se jam njeri i gjallë”, u shpreh gjyqtarja e revoltuar.
E pyetur nëse arrestimi saj nga SPAK kishte lidhje me vendimin e një viti më parë në Durrës kur konsideroi nul zgjedhjet vendore të 30 qershorit, ajo tha se kishte një vit që e priste arrestimin.
“Kam një vit që pres arrestimin pas vendimit për 30 qershorin. nuk më shqetëson fare. Jam e kënaqur që e bënë”, u shpreh ajo.
Gjyqtarja e Durrësit, por e komanduar prej disa muajsh në Gjykatën e Apelit të Korçës, Mimoza Margjeka, u arrestua së bashku me tre persona të tjerë për korrupsion nga Prokuroria e Posaçme Kundër Korrupsionit dhe Krimit të Organizuar (SPAK).
Margjeka, me detyrë gjyqtare, nëpërmjet bashkëshortit të saj, dekanit Cara, ka marrë një shumë prej 6.000 (gjashtë mijë) eurosh, si përfitim të paligjshëm.
Gjyqtarja M. M., duke abuzuar me detyrën, kundrejt përfitimit të 6 mijë eurove, ka bërë ndryshimin e masës së sigurisë në Gjykatën e Apelit Korçë për të arrestuarin O. B., i arrestuar për veprën penale “Dhënie ndihmë për kalim të paligjshëm të kufirit”, nga “Arrest në burg” në garanci pasurore 500.000 lekë.
Gjykata vendosi masën “Arrest në shtëpi” për Mimoza Margjeka banuese në Tiranë, gjyqtare në Gjykatën e Shkallës së Parë Durrës dhe e komanduar në Gjykatën e Apelit Korçë, për veprën penale “Korrupsioni pasiv i gjyqtarit, prokurorit apo funksionarëve të tjerë të drejtësisë”.
