Autoritetet e Kosovës kanë ndërmarrë një tjetër veprim ndaj institucioneve paralele në veri të vendit, duke marrë këtë javë nën kontroll një ndërtesë pranë liqenit të Ujmanit.
Aksioni, i asistuar nga Policia e Kosovës, u cilësua nga Serbia si një ndërhyrje në një hapësirë që, sipas tyre, përdorej nga Kryqi i Kuq për veprimtari humanitare dhe trajnime.
Zëvendësdrejtori për veriun në Policinë e Kosovës, Veton Elshani, konfirmoi për Radion Evropa e Lirë se objekti është marrë zyrtarisht në administrim nga institucionet kosovare.
Ky është veprimi më i fundit në një seri aksionesh kundër strukturave paralele serbe në veri, pas mbylljes së zyrës së Shërbimit Kombëtar të Punësimit në Mitrovicën e Veriut dhe disa institucioneve të tjera kulturore e sportive që kanë funksionuar jashtë sistemit ligjor të Kosovës.
Bashkimi Evropian reagoi duke paralajmëruar se veprime të tilla rrezikojnë të përshkallëzojnë tensionet në terren dhe dëmtojnë si jetën e përditshme të komuniteteve lokale, ashtu edhe imazhin ndërkombëtar të Kosovës.
Nga ana tjetër, Beogradi zyrtar dhe Lista Serbe e dënuan ashpër ndërhyrjen. Petar Petkoviq, drejtor i Zyrës për Kosovën në qeverinë serbe, tha se objekti ishte përdorur për kurse të ndihmës së parë, gara sportive dhe strehim të përkohshëm për sportistë e turistë.
Lista Serbe e quajti aksionin një “ndërhyrje brutale me urdhër të Albin Kurtit” dhe akuzoi qeverinë e Kosovës për shkelje të konventave ndërkombëtare, duke theksuar se Kryqi i Kuq në atë hapësirë kishte shërbyer për të gjitha komunitetet pa dallim.
