Deri tani në Shqipëri numërohen 634 të infektuar dhe 27 viktima nga koronavirusi që goditi vendin tonë më 9 mars.
Situata duket se po shkon drejt përmirësimit, teksa qeveria shqiptare ka gati planin e rihapjes që u prezantua ditën e sotme nga ministrja Ogerta Manastirliu.
Manastirliu prezanton planin e rihapjes: Do të kalojë në 4 faza, ja kriteret
Mirëpo, ditët e fundit është hapur një procedurë e dyshimtë tenderi nga Agjencia e Shërbimeve Funerale, ku kërkohet blerja e 136 arkivolëve të përmasave të ndryshme për viktimat e Covid-19 raporton “Gazeta Shqip”.
Konkretisht, kërkohet të blihen 56 arkivolë të vegjël, për fëmijë deri në 1 vjeç, 75 arkivolë të mëdhenj të madhësive standarte dhe 5 copë arkivolë më të mëdhenj se standarti.
Këto shifra të paraqitura në dokumentet e mëposhtme ngrejnë dyshime të mëdha rreth asaj çka raportojnë autoritetet shëndetësore, e sidomos fakti që janë porositur 56 arkivolë për të mitur deri në 1 vjeç, nga Agjencia e Funeraleve, pasi deri tani nuk raportohet për asnjë fëmijë të vdekur nga Covid-19.
Kujtojmë që me ligj është vendosur që viktimat e Covid-19 duhet të varrosen nga Agjencia e Funeraleve çka na bën të mendojmë se ky tender është zhvilluar për personat që kanë ndërruar jetë nga koronavirusi.
Në bazë të të dhënave zyrtare, Tirana, territor në të cilën vepron Agjencia e Shërbimeve Funerale që ka shpallur tenderin, numëron, në total që nga dita e parë, 256 persona të prekur, nga të cilët 15 kanë humbur jetën, ndërsa pjesa më e madhe e tyre janë shëruar.
Megjithatë, vlen të theksojmë se asgjë s’mund të jetë e sigurtë, teksa mbetemi në pritje të një reagimi zyrtar.
