Bashkia e Tiranës bën tender me “flamur të kuq” për furnizimin e kopshteve dhe çerdheve me mjete anti-Covid-19. Sipas Agjencisë së Prokurimit Publik, u regjistruan pesë ankesa nga 8 kompani që u skualifikuan. Kështu në garën për 37 milionë lekë ka mbetur vetëm një kompani.
Ankesat nuk merren parasysh, deklaroi komisioni. Ky tender është shënuar edhe me flamur tw kuq të nga Open Data Albania, për abuzim të mundshëm të autoriteteve.
Tenderi ka për objekt blerjen e pajisjeve të nevojshme për çerdhet dhe kopshtet për përballimin e situatës së pandemisë.
Drejtoria e Përgjithshme e Çerdheve dhe Kopshteve, ka hapur procedurën me një fond limit 37 milionë lekë dhe thirrjes i janë përgjigjur plot 9 kompani, 8 prej të cilave janë skualifikuar duke lënë kështu në garë vetëm fituesin, W Center.
Për blerjen e maskave, dorezave, sapunit dhe xhelit dezinfektues, ky subjekt ka ofertuar 34.3 milionë lekë të reja pa TVSH.
Por, referuar të dhënave në APP, ky prokurim rezulton të jetë shoqëruar me disa ankesa. 3 nga kompanitë pjesëmarrëse, një prej të cilave edhe e shpallur më pas fituesja, i janë drejtuar autoritetit kontraktor, prej të cilit kanë marrë përgjigje por jo zgjidhje.
Në këto kushte, dy prej operatorëve kanë paraqitur ankesë pranë Komisionit të Prokurimeve publike, i cili ka pranuar vetëm ankesën e subjektit W Center, për të cilin ka kërkuar kualifikimin.
Dyshimet shtohen sepse Drejtoria e Çerdheve dhe Kopshteve për këtë prokurim kishte vendosur skualifikimin e të gjithë operatorëve pjesëmarrës në garë, por pas ndërhyrjes nga ana e KPP-së fitues është shpallur pikërisht subjekti ankimues.
