Qindra banorë të lagjes “Germadh” në Njësinë Administrative Dajt, Tiranë, po përballen me një krizë të rëndë për shkak të mungesës totale të ujit të pijshëm.
Me temperatura që kalojnë 40°C, banorët janë detyruar të kërkojnë ujë në lagje të tjera, duke mbushur bidona për të përmbushur nevojat bazë të familjeve të tyre.
Një prej tyre, kryefamiljar i një shtëpie me 12 anëtarë, përfshirë pesë fëmijë, tregon se çdo ditë largohet nga lagjja për të siguruar ujin e domosdoshëm për jetesë. Ai shpreh zhgënjimin nga mosreagimi i deputetit dhe bashkisë, të cilëve u ka kërkuar ndihmë, por ka marrë vetëm indiferencë dhe mosrespekt.
Banorët e “Germadhit” akuzojnë drejtpërdrejt autoritetet lokale dhe Bashkinë e Tiranës për neglizhencë të qëllimshme dhe trajtim të padrejtë në furnizimin me ujë.
Ata theksojnë se, ndërsa lagjet më të pasura të qytetit furnizohen pa ndërprerje, ata jetojnë në kushte të vështira, pa ujë, me rrugë të paasfaltuara dhe pa ndriçim publik.
“Ndërkohë që në lagjet elitare ka ujë 24 orë në ditë, rrugë të asfaltuara dhe ndriçim, ne këtu jetojmë si në shkretëtirë. Nuk ka ujë, nuk ka asnjë ndihmë. A ekziston një shtet që t’i kontrollojë këta njerëz? A ka zë që na mbron ne?”, shprehet një banor i zonës.
Në këto kushte, banorët e Dajtit kërkon ndërhyrje urgjente dhe zgjidhje konkrete për krizën që po kthehet në një emergjencë humanitare në zemër të kryeqytetit. Ata kërkojnë gjithashtu përgjegjësi nga zyrtarët që kanë lejuar degradimin e furnizimit me ujë në një situatë kaq kritike.
