Të shtëna me armë zjarri kanë tronditur paraditen e sotme fshatin Gosë në Rrogozhinë, ku një konflikt mes fqinjësh ka përfunduar me plagosjen e dy personave.
Ngjarja ndodhi rreth orës 10:15, kur shtetasi Sh. O. dyshohet se qëlloi me pistoletë ndaj çiftit bashkëshortor Sami dhe Nadire Disha.
Burime nga vendngjarja bëjnë me dije se sherri nisi për motive të dobëta dhe degjeneroi në përdorimin e armës.
Si pasojë, Sami Disha u plagos në këmbë, ndërsa bashkëshortja e tij, Nadire Disha, mori një plumb në bark. Të dy ndodhen jashtë rrezikut për jetën.
Menjëherë pas ngjarjes, forcat e Policisë rrethuan zonën dhe nisën operacionin për kapjen e autorit, i cili dyshohet se është fshehur në afërsi.
Në ndihmë të strukturave lokale janë angazhuar edhe forcat operacionale të Drejtorisë Vendore të Policisë Durrës.
Grupi hetimor, nën drejtimin e Prokurorisë, po vijon punën për të sqaruar rrethanat dhe për të dokumentuar ligjërisht këtë akt të rëndë.
