Edhe pse kanë kaluar muaj që nga fillimi i pandemisë botërore dhe luftës me COVID-19 ende ka njerëz që mendojnë se Coronavirus është një trillim dhe se virusi në të vërtetë nuk ekziston.
Por janë mjekët atë që përballen çdo ditë me sëmundjen në frontin e parë të luftës, që bëjnë thirrje që “armiku i padukshëm” është realisht mes nesh dhe se duhet të mbrohemi.
Të njëjtën gjë ka bërë mjeku infeksionist, Pëllumb Pipero, i cili thotë se duhet ndaluar publikimi i deklaratave që mohojnë apo neglizhojnë rrezikun e koronavirusit.
Në TvT, Pipero tha se deklarata të tilla krijojnë çoroditje, në një kohë kur virusi është i pranishëm dhe do të vijojë të mbetet i tillë.
“Shumë njerëz më pyesin a është e vërtetë, madje edhe njerëz të shkolluar. Duhet ta prekësh me dorë që ta besosh. Në Itali të thuash që nuk ka virus, është e dënueshme me ligj. Unë do t’u rekomandja qytetarëve, edhe atyre me akses në media, të mos bëjnë deklarime të tilla që krijojnë coroditje.
Situata është botërore. Njerëzit kanë nevojë për të vërtetën dhe për ndërgjegjësim. Virusi qarkullon dhe do të na shoqërojë për shumë kohë. Do të kishte sens që të ndalohej hedhja dhe publikimi i deklaratave të tilla që janë të dëmshme”, tha ai.
Kujtojmë se sot është shënuar një bilanc i rëndë i viktimave nga Covid-19 brenda 24 orëve të fundit në vendin tonë. 4 viktima mes të cilave dhe një 21-vjeçare e cila është viktima më e re nga koronavirusi në vend.Nga të dhënat e Ministrisë së Shëndetësisë moshat e viktimave kanë qenë 23, 49, 56 dhe 67 vjeç. Ndërkohë, janë shënuar 85 raste të reja me Covid-19 brenda 24 orëve në vendit tonë dhe 88 të shtruar në spitalin infektiv.
