Flamur, Gëzime dhe Leon Sula, prindërit dhe vëllai i 22-vjeçares shqiptare, Ilaria Sula, e cila u vra me thikë nga ish-i dashuri filipinas Mark Samson, kanë folur për mediat italiane rreth ngjarjes tragjike që ka tronditur familjen e tyre.
“Ai duhet të kalbet në burg përjetë,” kanë shprehur prindërit e Ilarias.
Ata kanë theksuar se ajo që ka ndodhur me vajzën e tyre është një akt kaq brutal, saqë as për kafshët nuk bëhet.
“Ajo nuk ishte një objekt, nuk ishte një palë këpucë, ishte një njeri,” ka thënë babai i saj, duke folur për dhunën e përjetuar nga Ilaria, e cila u hodh në një shkëmb pas vrasjes dhe u fut në një valixhe.
Ilaria ishte një vajzë me ëndrra, duke studiuar për Statistikat Financiare dhe ishte pranë diplomimit në tetor të këtij viti.
Prindërit e saj kanë rrëfyer se ajo ishte gjithmonë e angazhuar dhe e përkushtuar për të realizuar ëndrrat e saj, duke e cilësuar atë si “engjëllin” e tyre.
Nëna e Ilarias, Gëzimja, ka kujtuar momentin kur vajza i kishte thënë se do të shkonte për t’u takuar, por kur vëllai i saj shkoi ta merrte në stacionin e trenit, ajo nuk erdhi.
“E prisnim atë fundjavë. Treni mbërriti dhe u largua përsëri, dhe Ilaria nuk ishte aty. Atëherë e kuptuam se diçka kishte ndodhur,” ka shpjeguar Gëzimja.
Me lot në sy, ata kërkojnë drejtësi për vrasjen e vajzës së tyre dhe shprehen se një pjesë e zemrës së tyre është shuar për gjithmonë.
“Ata na hoqën një pjesë të zemrës, gjithçka. Vajza jonë është e mbyllur në një vend që nuk mund ta lërë më, nuk mund të kthehet në shtëpi, nuk do ta shohim më kurrë të hyjë në derë, të qëndrojë në dhomën e saj. Ajo na jepte forcë. Ne kemi për detyrë të sigurojmë që drejtësia të vihet në vend”, kanë thënë ata.
Në lidhje me nënën e Mark Samsonit, e cila është akuzuar se e ka ndihmuar djalin e saj të fshihte gjurmët e krimit, prindërit e Ilarias kanë shprehur indinjatë.
“Si mund ta bësh një gjë të tillë? Ajo duhet të kishte thirrur ndihmë, jo të ndihmonte në mbulimin e krimit,” ka thënë Flamur Sula.
Vëllai i Ilarias, Leon, ka shprehur dëshirën për të ditur nëse motra e tij ka pasur mundësinë të thotë fjalët e saj të fundit.
“Doja të dija nëse ajo pati mundësinë të fliste për herë të fundit… Kush kanë qenë fjalët e fundit?” ka thënë ai, ndërsa babai shtoi, “Mbase do të ketë thënë diçka për mamanë…”
