Fier– Mbi 300 të dënuar që vuajnë dënimin në burgun e Fierit i kanë dërguar një letër kryetarit të Kuvendit, Gramoz Ruçit.
Me anë të kësaj letre ata kanë kërkuar falje dhe luten për një amnisti të përgjithshme.
Më tej të burgosurit shkruajnë se ndihen të diskriminuar nga drafti i amnistisë vetëm për gratë.
“Ndjehemi të diskriminuar nga ky draft i përpiluar për arsye se edhe ne kemi familje, fëmijë të mitur, vëllezër e motra që na presin me padurim të jemi pranë tyre, nënat tona që nuk i thahen lotët derisa të na shohin pranë shtëpisë, pranë sofrës. Të gjithë bëjmë gabime, jemi njerëz dhe meritojmë një shans, pa dallim, femra dhe meshkuj”.- shkruajnë të dënuarit.
Kjo letër është firmosur nga mbi 300 të burgosur.
Letra e plotë
“I nderuar zoti Gramoz Ruçi!
Kemi dëgjuar me vëmendje znj.ministre Etilda Gjonaj për draftin e amnistisë. Ndjehemi të diskriminuar nga ky draft i përpiluar për arsye se edhe ne kemi familje, fëmijë të mitur, vëllezër e motra që na presin me padurim të jemi pranë tyre, nënat tona që nuk i thahen lotët derisa të na shohin pranë shtëpisë, pranë sofrës. Të gjithë bëjmë gabime, jemi njerëz dhe meritojmë një shans, pa dallim, femra dhe meshkuj. Katastrofa natyrore na tronditi të gjithëve, jashtë njerëzit e lirë kishin mundësi të dilnin jashtë shtëpive të tyre, por ne, të dënuarit, vetëm Zotit i luteshim, mëshirë te ai kërkuam sepse ishim brenda katër mureve në pamundësi për të dalë, të panikosur dhe me mendje te shtëpia, tek fëmijët e familjet tona…
Ju lutemi gëzojini familjet tona, nënat tona, me një amnisti të përgjithshme, pa dallime.
Ju lutemi merreni në konsideratë kërkesën tonë,
Me shpresë e me respekt të dënuarit e I.E.V.P Fier.”
Kujtojmë se nga amnistia e këtij viti përfituan 650 gra të burgosura. (Lexoni më shumë)
