Një incident i rëndë ka ndodhur në orët e para të mëngjesit në burgun e Korfuzit, ku disa të burgosur me origjinë shqiptare dhe gjeorgjiane kanë shkaktuar revoltë, duke refuzuar të kthehen në qeli dhe duke i vënë zjarrin dyshekëve dhe objekteve të tjera në brendësi të sektorëve E dhe Z të institucionit.
Zjarrfikësit ndërhynë me shpejtësi dhe arritën ta vendosin situatën nën kontroll, ndërsa në vendngjarje mbërritën drejtori i policisë së ishullit dhe dy negociatorë, të cilët po përpiqen të qetësojnë situatën dhe të bisedojnë me të burgosurit për të kuptuar arsyet e protestës.
Sipas burimeve nga mediat greke, rebelimi ka lidhje me një kontroll të fundit në qeli, gjatë të cilit autoritetet sekuestruan disa aparate celularë. Kjo ka shkaktuar pakënaqësi të thellë te disa prej të dënuarve, çka përshkallëzoi tensionin në ambientet e burgut.
Aktualisht, autoritetet greke kanë nisur hetimet për të identifikuar organizatorët e incidentit dhe për të përcaktuar masat disiplinore që do të merren ndaj tyre. Situata brenda institucionit është stabilizuar, por masat e sigurisë janë shtuar.
