Përfshirja e Inteligjencës Artificiale në procesin e prokurimeve publike, sipas kreut të Qeverisë do të çonte drejt zeros korrupsionin në tendera. Por me lëvizjen e fundit, u vërtetua e kundërta.
Me tender me fond limit prej 74.5 milionë lekësh, AI ose Inteligjenca Artificiale është vendosur që të zbardhë fjalë për fjalë fjalimet e deputetëve në Kuvendin e Shqipërisë.
Ndërkohë që një vit më parë Agjencia Kombëtare e Shoqërisë së Informacionit çeli tenderin me një fond limit 279 milionë lekë apo rreth 2.6 milionë euro me objekt “Përdorimi i Inteligjencës Artificiale në procesin e Transpozimit të Aqcuis për Integrimin Evropian”.
Pra 2.6 mln euro janë dashur për projektin që lidhet me BE, megjithatë për të zbardhur fjalimet e deputetëve të Kuvendit duhet shifra e çmendur prej 74.5 milionë lekësh, që do të derdhen nga xhepat e qytetarëve.
Ky tender është shpallur për ndërtimin e një platformë të re e cila do të transkriptojë të gjitha takimet që janë pjesë e aktivitetit parlamentar si seancë plenare, mbledhje komisionesh parlamentare dhe çdo mbledhje tjetër të forumeve të Kuvendit.
74.5 milionë lekë nga buxheti i shtetit do të shpenzohen për të blerë transkriptimin e të dhënave audio video të Kuvendit të Republikës së Shqipërisë, bazuar në inteligjencën artificiale si dhe shërbim mirëmbajtje 48 muaj. Aplikimi i inteligjencës artificiale do të shtrihet edhe në institucione të tjera publike.
