Kryeministri i Kosovës, Albin Kurti pas përfundimit të takimit në Bruksel me Presidentin serb Aleksandër Vuçiç, në një prononcim për mediat ka thënë se ky i fundit, i ka refuzuar propozimin e një marrëveshjeje me gjashtë nene. Kurti shprehet se marrëveshja që iu refuzua ishte si një deklaratë paqeje mes Kosovës dhe Serbisë. Ai ka thënë se kjo deklaratë e shkurtër u refuzua ende pa u lexuar nga Vuçiç.
“Unë sot propozova fillimisht një marrëveshje të shkruar me gjashtë nene si një deklaratë e paqes mes Kosovës dhe Serbisë, e cila u refuzua. U refuzua ende pa u lexuar dhe kjo për mua tregonte mosgatishmërinë për marrëveshje”, tha kryeministri i Kosovës, Albin Kurti.
Gjithashtu më tej Kurti tha se propozimi i tij u pranua me butësi nga shefi i diplomacisë së Bashkimit Evropian, Josep Borrell, por që u refuzua nga presidenti serb. Ai ka thënë se ballafaqimi me të shkuarën është i domosdoshëm.
“Insistuam aty ku shprehet zotimi ynë për të pagjeturit, të futet edhe fjala “ballafaqimi me të kaluarën. Kjo u pranua në një mënyrë të zbutur nga Josep Borrell, mirëpo u refuzua nga presidenti i Serbisë.Unë nuk e kuptoj se pse duhet t’i frikësohemi kaq shumë përballjes me të kaluarën. Ballafaqimi me të kaluarën është i domosdoshëm”, përfundoi Albin Kurti.
