Ish-ministri i Brendshëm, Saimir Tahiri, ka lënë me gojë hapur të gjithë të pranishmit të Krimet e Rënda, teksa ka rrëzuar një nga një akuzat ndaj tij.
Ndërsa bënte mbrojtjen, Tahiri nuk ka kursyer edhe ministrat e tanishëm në kabinetin qeveritar.
Ish-ministri ka ironizuar në lidhje me faturat e kripura të hoteleve të paguara me paratë e buxhetit të shtetit, por nuk ka përmendur emra.
Më tej ai shtoi, se fatura më e shtrenjtë e paguar prej tij ka qenë 140 euro, shkruan “Balkanweb”.
Tahiri u shpreh:
“Prokuroria ka hetuar të gjithë lidhjet e mia shoqërore dhe ka pyetur me letër porosi, se c’ punë kishte këtë nuk e di. Ka cuar letër porosi dhe ka pyetur edhe për çmimet e hoteleve ku kam fjetur, në media u tha se unë flija në hotele me 1 mijë euro nata. Por ju garantoj se me letër porosi është garantuar se çmimi më i shtrenjtë i paguar si ministër, është vetëm 140 euro, jo si ajo tjetra që paguante 900 euro nata.”
Kujtojmë këtu se gjatë ditës së sotme, organi i akuzës kërkoi 12 vjet burg për Saimir Tahirin.
Ky i fundit do të përfitojë uljen me 1/3 të dënimit, për shkak se gjykata pranoi kërkesën e tij për gjykim të shkurtuar.
