Supergrabitja e Rinasit, dyshohet i përfshirë një ish-komando

Policia vijon me kërkimin se kush janë grabitësit e tjerë që morën në Rinas 6.5 milionë euro. Dyshohet se, Admir Murataj ka bashkëpunuar më një ish-komando të ushtrisë për të realizuar  grabitjen e parave në pistën e Rinasit mesditën e 9 prillit.

Bëhet fjalë për grabitësin që qëndron në krah të Admir Muratajt. Ekspertët i kanë shtuar dyshimet mbi ish – komandon nisur nga lëvizjet e tij. Ai mban pozicion trupor dhe armën në mënyrë të ngjashme me ato të forcave speciale të ushtrisë.

Hetuesit, pasi kanë analizuar pamjet filmike dhe kanë vëzhguar lëvizjet e personave që nën kërcënimin e armëve rrëmbyen paratë, kanë dyshime se një prej tyre është ish-komando.

Në vendin e ngjarjes janë gjetur 10 gëzhoja kallashnikovi, të qëlluara nga dy armë të ndryshme. Ndërsa Admir Murataj rezulton të jetë qëlluar vetëm me 1 plumb, i cili i ka hyrë në syrin e majtë dhe ka dalë pas kokës.

Nuk është e qartë nëse komandoja është përfshire në shkëmbimin e zjarrit me Forcat e Ndërhyrjes së Shpejtë, ku mbeti i vrarë Murataj. Burime nga grupi hetimor i thanë “Televizionit Klan” se vetëm 2 nga 5 grabitësit kanë përdorur armët.

Hetimet vazhdojnë, ndërsa Prokuroria e Krimeve të Rënda përmes një shkrese, u ka kërkuar tre bankave të nivelit të dytë të saktësojnë shumën e parave që u grabit.

Prej kësaj ngjarje, bankat dhe kompanitë ajrore kanë refuzuar të bëjnë dërgesa të tjera të parave jashtë vendit, shkak për ta është pasiguria në Rinas.